Paaftësia e tyre mazhorancës dhe opozitës në Kosovë për të gjetur kompromisin ishin faktori që e coi vendin për herë të tretë brenda pak më shumë se një viti në zgjedhje parlamentare. Megjithatë, në një pikë sot, në ditën e votimit, mesazhet e liderëve nga të dyja palët dëshmuan dakordësi: Thirrjet e tyre kishin si emërues të përbashkët nevojën për pjesëmarrje të lartë në zgjedhje, dhe këmbënguljen që ky proces të mos përsëritet më deri pas katër viteve. Zgjedhjet e sotme vijnë në vazhdën e krizave të njëpasnjëshme politike dhe mungesës së konsensusit ndërmjet partive për emrin e kreut të shtetit. Si për ironi, për shumë ekspertë, pikërisht kompromisi ndërpartiak që nuk u arrit dot deri më sot, mbetet një domosdoshmëri për kapërcimin e ngërcit. Kryeministri në detyrë i Kosovës, Albin Kurti ka ushtruar të drejtën e tij të votës në kuadër të zgjedhjeve të parakohshme parlamentare, duke u bërë thirrje qytetarëve që të marrin pjesë sa më shumë në procesin zgjedhor. Pas votimit, Kurti deklaroi se dita e zgjedhjeve është një ditë e rëndësishme për vendin, ndërsa inkurajoi qytetarët që paraprakisht të verifikojnë qendrën e tyre të votimit përmes platformës së Komisionit Qendror të Zgjedhjeve. Kandidatja për presidente nga Lidhja Demokratike e Kosovës (LDK), Vjosa Osmani ka ushtruar të drejtën e saj të votës në kuadër të zgjedhjeve të parakohshme parlamentare, duke bërë thirrje për një proces të rregullt dhe demokratik.