Presidenti amerikan Donald Trump dhe kancelari gjerman Friedrich Merz u takuan sot në Zyrën Ovale të Shtëpisë së Bardhë, ku në qendër të diskutimeve ishte lufta në Ukrainë. Të dy liderët u shprehën të shqetësuar për vazhdimin e konfliktit dhe nënvizuan domosdoshmërinë e një zgjidhjeje të shpejtë. Presidenti Trump deklaroi se Shtetet e Bashkuara nuk janë aspak të lumtura me situatën në Ukrainë, por shfaqi optimizëm se një fund i përgjakjes është i mundshëm. “Nuk është mirë. Ai [Merzi] nuk është i lumtur. As unë s’jam i lumtur. Por mendoj se eventualisht do të jemi të suksesshëm për ta ndaluar gjakderdhjen,” u shpreh Trump para gazetarëve. Kancelari Merz falënderoi presidentin për mikpritjen dhe kujtoi vizitën e tij të parë në Shtëpinë e Bardhë në vitin 1982. Si një shenjë simbolike, ai i dhuroi Trumpit një kornizë me certifikatën e lindjes së gjyshit të tij, Frederick Trump, i cili kishte lindur në Gjermani. I pyetur për mundësinë e sanksioneve të reja ndaj Rusisë, presidenti Trump u shpreh i prerë: “Do të jemi shumë të ashpër, qoftë për Rusinë apo këdo tjetër. Kjo është një masakër që po ndodh atje,” tha ai. Trump deklaroi se kishte folur me presidentin rus Vladimir Putin, i cili i kishte thënë se Rusia u detyrua të përgjigjej ndaj sulmeve të Ukrainës brenda territorit rus. Megjithatë, Trump theksoi se e kishte këshilluar Putinin të ndalonte dhunën. Presidenti amerikan konfirmoi se SHBA do të vazhdojë mbështetjen për Kievin. “Po, jam me Ukrainën. Sapo kemi nënshkruar një marrëveshje të rëndësishme për mineralet e rralla. Për mua, ndalimi i vrasjeve është më i rëndësishëm se çdo gjë,” theksoi ai. Nga ana e tij, kancelari gjerman Friedrich Merz vlerësoi Trumpin si një faktor vendimtar në ndaljen e luftës.