Gjermanët votojnë këtë të diel në dy lande, Berlin dhe Mecklenburg-Pomerania Perëndimore, në zgjedhje që mund të japin një sinjal të fortë për qeverinë e kancelarit gjerman, raporton “The Guardian”. Në qendër të vëmendjes është Alternativa për Gjermaninë, AfD-ja e ekstremit të djathtë, e cila kërkon të konsolidojë rritjen e saj pas rezultatit rekord të marrë dy javë më parë në Saksoni-Anhalt. Pas kësaj, kërkesave për dorëheqje, Merz iu përgjigj duke thënë se “Ne u zgjodhëm për katër vjet. Unë u zgjodha për katër vjet. Dhe dua t’i përdor këto katër vite për ta nxjerrë vendin nga kjo periudhë e vështirë.” Por presioni mbi kancelarin është shtuar. Mbështetja për Merz ka rënë ndjeshëm, ndërsa premtimet për rikthimin e ekonomisë gjermane në rritje dhe frenimin e AfD-së nuk kanë dhënë rezultatet e pritshme. Ekonomia, rritja e kostos së jetesës dhe kriza në industrinë gjermane, veçanërisht në sektorin e automobilëve, mbeten ndër shqetësimet kryesore të votuesve. Një prej temave kryesore të fushatës është kostoja e strehimit. Rreth 85% e familjeve në Berlin jetojnë me qira, ndërsa çmimet e qirave të shpallura janë pothuajse dyfishuar që nga viti 2014.