Nga “Shtëpia e Bardhë, ku takoi Presidentin Donald Trump, në të parin takim si Kancelar i Gjermanisë, Friedrich Merz, ofroi gatishmërinë e tij për forcimin e lidhjeve me Shtetet e Bashkuara. “Kemi shumë të përbashkëta në historinë tonë. U kemi shumë borxh amerikanëve. Ne nuk do ta harrojmë këtë kurrë”, tha Merz gjatë bashkëbisedimit me Trumpin para gazetarëve në Zyrën Ovale në Uashington, duke iu referuar pjesërisht edhe prejardhjes gjermane të Trumpit. Trump e quati atë “burrë shumë të respektuar”. “Do të kemi marrëdhënie të mrekullueshme me shtetin tuaj”, u shpreh presidenti amerikan, duke shtuar se trupat amerikane do të vazhdojnë të qëndrojnë në Gjermani, dhe që është gjë pozitive që Berlini është duke shpenzuar më shumë para në mbrojtje. Ai e përshkroi Merzin si figurë që ka fituar bindshëm zgjedhjet, dhe duke bërë shaka tha se Kancelari duket “i vështirë”. Përgjatë takimit, Merz i bëri thirrje Trumpit që të ushtrojë më tepër presion ndaj Rusisë, në mënyrë që të përfundojë lufta trevjeçare kundër Ukrainës. “Ju e dini se ne mbështesim Ukrainën, dhe po presim më shumë presion ndaj Rusisë”, u shpreh Kancelari gjerman. Gjermania është mbështetësja e dytë më e madhe për Ukrainën – pas Shteteve të Bashkuara - në aspektin ushtarak dhe financiar, teksa Kievi lufton pushtimin rus. Lufta në Ukrainë ka nisur më 24 shkurt të vitit 2022. Presidenti rus, Vladimir Putin, e quan luftën “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës, kanë vdekur mijëra persona dhe miliona të tjerë janë zhvendosur nga shtëpitë e tyre.