Fitorja e thellë e ekstremit të djathtë, partisë Alternativa për Gjermaninë, ka rikthyer përplasjen mes Kancelarit Fridrich Merz dhe Presidentit të Shteteve të Bashkuara të Amerikës, Donald Trump. Këtë të mërkurë, Kancelari gjerman, Friedrich Merz, anuloi një telefonatë të planifikuar me presidentin Trump, pasi ky i fundit mbështeti hapur fitoren e AFD-së. Një zëdhënës i kancelarit Merz nuk pranoi të jepte shpjegime, por vuri në dukje se Merz gjithmonë kishte kundërshtuar në “terma të përgjithshëm ndërhyrjen ose komentimin e situatës politike të brendshme, veçanërisht në lidhje me zgjedhjet”. Pas shpalljes së rezultateve, që e nxorën AFD-në fituese me rreth 44% të votave, kreu i Shtëpisë së Bardhë reagoi përmes një postimi në Truth Social. “Natë vërtet shumë e madhe e AFD-së në Saksoni-Anhalt. Ata më në fund u lodhën nga rregullat absolutisht të tmerrshme të migracionit, që e kanë dëmtuar kaq keq Gjermaninë”, shkroi Presidenti Trump. Partia Alternativa për Gjermanin ka bërë vazhdimisht thirrje për dëbime në shkallë të gjerë të emigrantëve të parregullt, një politikë që pritet të përballet me sfida të ashpra sipas ligjit gjerman. Merz, partia e të cilit fitoi vetëm 17% në zgjedhje, u përplas në Bundestag me AFD-në, teksa sulmoi politikën e tyre për “remigrimin”, që parashikon dëbime masive të emigrantëve dhe azilkërkuesve të refuzuar. Fjala ‘remigrim’ nuk është gjë tjetër veçse një sinonim për spastrimin etnik, bazuar në origjinën dhe ngjyrën e lëkurës. Për kancelarin Merz, largimi i emigrantëve që punojnë në Gjermani do të godiste rëndë ekonominë dhe shërbimet jetike. Drejtuesit e AFD-së iu përgjigjën me ironi, teksa iu drejtuan Merz me mesazhin: “Zoti kancelar, zgjedhësit në Saksoni-Anhalt jua bënë shumë të qartë, në gjuhën e sovranit demokratik: koalicioni juaj ka marrë fund.