Mbështetja për Kievin vazhdon, por në Gjermani ka një lodhje nga refugjatët ukrainas, e kjo u pa qartë tek thirrja e kancelarit Friedrich Merz që iu bashkua politikanëve të tjerë të CDU/CSU në kërkesen për reduktimin e fluksit të meshkujve të rinj ukrainas në Gjermani. Merz tha se në një bisedë telefonike me Presidentin ukrainas Volodymyr Zelenski disa ditë më parë, ka insistuar “ që të rinjtë nga Ukraina të mos vërshojnë më kaq shumë drejt Gjermanisë. “Ata duhet duhet t'i shërbejnë atdheut të tyre, ishte komenti i tij. Ukraina ka nevojë për ta. Kryeministri bavarez dhe kreu i CSU Markus Söder ishte politikani i parë i lartë që bëri një deklaratë të ngjashme. Në një intervistë me Bild, ai i bëri thirrje BE-së dhe qeverisë gjermane të ushtrojnë presion mbi Kievin në mënyrë që autoritetet atje "të kontrollojnë dhe të ulin ndjeshëm" fluksin e të rinjve. Në fund të gushtit, qeveria në Kiev lejoi edhe të rinjtë e moshës 18 deri në 22 vjeç të largoheshin nga vendi. Në Ukrainë, ata nuk rekrutohen në ushtri, por deri më tani nuk u është lejuar të largohen nga vendi. Sipas Ministrisë së Brendshme të Gjermanisë, numri i mbërritjeve javore në këtë grupmoshë është rritur nga 19 në mesin e gushtit në 1.800 në fund të tetorit. Në total, më shumë se 1.2 milion refugjatë nga Ukraina jetojnë në Gjermani. Sipas ekssertëve, shqetësimi i kancelarit se të rinjtë, të cilët i nevojiten Ukrainës, po largohen nga vendi, është vetëm njëra anë e medaljes, ndërsa tjetra është se qeveria e Merzit po tenton kufizimin e fluksit të emigracionit, teksa ai vetë po synon të përmbushë premtimet e bëra gjatë fushatës.