Ish-kancelarja gjermane Angela Merkel konsiderohet si ndërmjetësuesja optimale për negociatat midis BE-së dhe Rusisë. Sipas të përditshmes gjermane “Spiegel” kjo ide po artikulohet jo vetëm në Gjermani, por edhe në zyrat e BE-së. Në qarqet politike, Merkel përshkruhet si kandidatja më e mirë për rolin e ndërmjetëses, sepse ajo i njeh personalisht si Presidentin ukrainas Volodymyr Zelenskyy ashtu edhe Presidentin rus Vladimir Putin. Një faktor tjetër që po merret në konsideratë është fakti se ajo ka qenë jashtë zyrës për një kohë mjaft të gjatë. Nga ana tjetër reagoi zyra e ish-kancelares duke thënë se deri më tani nuk ka marrë asnjë kërkesë zyrtare në lidhje me pjesëmarrjen e saj në negociata. Zëdhënësi i Merkel nuk është përgjigjur kur është pyetur nëse ajo do të ishte e gatshme të merrte përsipër këtë rol në të ardhmen. Vendet evropiane duan të marrin pjesë drejtpërdrejt në dialogun me Moskën, duke marrë parasysh përvojën e mëparshme të ndërmjetësimit të SHBA-së. Përfaqësuesja e Lartë e BE-së, Kaja Kallas, theksoi se nuk do të ishte "shumë e mençur" të lihej Kremlini të diktonte negociatorin. Më 9 maj presidenti rus tha se e konsideron ish-kancelarin gjerman Gerhard Shrëder kandidatin më të mirë të BE-së për të marrë pjesë në negociatat e mundshme për t'i dhënë fund luftës. Ideja e Vladimir Putin u refuzua në Gjermani. Një zyrtar gjerman theksoi se kandidatura e Shrëder si ndërmjetës midis BE-së dhe vendit agresor nuk po merret në konsideratë.