Ka befasuar ish-Zonja e Parë e SHBA-së, Jill Biden , me pohimin se gjatë debatit presidencial të vitit 2024 mes Joe Biden dhe Donald Trump pati frikë se bashkëshorti i saj mund të pësonte një hemoragji cerebrale. Në një interviste për CBS, Jill rrëfeu se e kishte parë Biden-in në vështirësi të mëdha për t’u shprehur, teksa dukej dhe shumë i lodhur gjatë debatit 90-minutësh në Atlanta. “Isha e tmerruar… mendova: ‘O Zot, po pëson goditje në tru’”, ka pohuar ajo. Debati i qershorit 2024 shkaktoi shqetësim të madh në kampin demokrat, pasi presidenti i atëhershëm mezi po fliste, me pauza të gjata dhe disa gabime në përgjigje, e madje dha edhe një deklaratë të pasaktë që më pas u sqarua nga stafi i tij. Performanca e tij e dobet solli presion të fortë politik nga brenda Partisë Demokratike dhe donatorët, cka solli më vonë në tërheqjen e tij nga gara presidenciale. Bideni më pas mbështeti zëvendëspresidenten Kamala Harris, e cila pati pak kohë për të zhvilluar fushatën e saj para zgjedhjeve. Pavarësisht kritikave, Jill Biden e ka mbrojtur publikisht bashkëshortin e saj dhe pritet të publikojë një libër ku trajton periudhën e zgjedhjeve të vitit 2024 dhe tërheqjen e tij nga gara.