Kryeministrja italiane Giorgia Meloni u prit me duartrokitje në Mar-a-Lago të Floridës, më udhëtimin e saj të papritur për t'u takuar me Presidentin e zgjedhur Donald Trump. Edhe pse detaje nga biseda e tyre nuk janë bërë publike, Zëvendëskryeministri italian Matteo Salvini tha të dielën se ato mbuluan një sërë çështjesh, përfshirë gjendjen e rëndë të Cecilia Salas, një gazetare italiane e arrestuar muajin e kaluar në Iran. "Të lumtë Giorgia Meloni që takove Donald Trumpin për të folur për paqen, bashkëpunimin në industri dhe tregëti, sigurinë dhe lirimin e Cecilias," shkroi kreu i partisë së koalicionit Liga, në platformën X. Kjo lëvizje e shefes së ekzekutivit italian është përshkruar si përpjekje e një lidere kryesore europianë për të forcuar lidhjet me Trump para se ai të marrë detyrën më 20 janar. Meloni u prit me duartrokitje në Mar-a-Lago, pas një prezantimi të saj nga presidenti i zgjedhur, sipas videove të shpërndara në mediat sociale nga gazetarët dhe të pranishëm të tjerë. "Jam shumë i lumtur që jam këtu me një grua fantastike, kryeministren e Italisë. Ajo vërtet ka triumfuar në Evropë," është shprehur Trump sipas mediave vendase. Meloni konsiderohet si një aleate e fortë e mundshme për Trump, duke pasur parasysh kredencialet e saj konservatore dhe stabilitetin e koalicionit të krahut të djathtë që ajo udhëheq në Itali që nga fundi i vitit 2022. Meloni ka krijuar sakaq një marrëdhënie të ngushtë me miliarderin Elon Musk, një nga njerëzit më të afërt të Trumpit aktualisht.