Marina izraelite po përgatitet të marrë kontrollin e mbi 50 anijeve të përfshira në Flotiljen Globale “Sumud”, një nismë ndërkombëtare humanitare që ka hyrë tashmë në rrezen e mbikëqyrjes ushtarake të Izraelit. Sipas një deklarate zyrtare qeveria izraelite nuk ka ndërmend të lejojë që flotilja të hyjë në ujërat territoriale të Rripit të Gazës. Autoritetet izraelite e konsiderojnë këtë një përpjekje për të thyer bllokadën detare të vendosur ndaj Gazës. Në lidhje me këtë situatë reagoi edhe kryeministrja e Italisë, Giorgia Meloni, e cila tha se po rrezikohet plani i paqes nga presidenti amerikan Donald Trump. “Me planin e paqes për Lindjen e Mesme të Donald Trump, më në fund kemi hapur derën për një marrëveshje për t’i dhënë fund luftës dhe vuajtjeve të popullsisë palestineze. Kjo shpresë mbështetet në një ekuilibër të brishtë dhe kam frikë se përpjekja e Flotiljes për të thyer bllokadën detare izraelite mund të jetë një pretekst. Prandaj mendoj se Flotilja duhet të ndalet tani. Çdo zgjidhje tjetër rrezikon paqen,” u shpreh Meloni të martën në mbrëmje. Edhe Papa Leo i XIV-të komentoi situatën, duke theksuar nevojën për përgjegjshmëri dhe humanizëm në trajtimin e kësaj krize. “Situata është shumë e vështirë. Le të shpresojmë të mos ketë dhunë dhe që njerëzit të respektohen,” tha Papa gjatë një deklarate nga Vatikani. Ndërkohë, reagimi më i fortë në Itali ka ardhur nga sindikata më e madhe në vend, Konfederata e Përgjithshme e Punëtorëve, e cila ka shpallur grevë në shenjë proteste ndaj qëndrimit të qeverisë italiane.