Policia e Katanias në koordinim me Prokurorinë, kreu Operacionin “Takedown”, më i madhi kundër piraterisë audiovizive të kryer në Itali dhe Europë. Në aksion morën pjesë edhe Eurojust me Europol, duke çmontuar organizatën kriminale më të përhapur transnacionale, e cila u shërbeu ilegalisht mbi 22 milionë përdoruesve. Sipas medias italiane akuzat janë për shkelje të së drejtës së autorit, akses të paautorizuar në sistemet kompjuterike, posedim të kodeve të aksesit dhe mashtrim kompjuterik. U sekuestruan mbi 2500 kanale dhe serverë të paligjshëm të cilët menaxhonin shumicën e sinjaleve të paligjshme në Europë, të cilat gjeneruan një qarkullim të paligjshëm prej mbi 250 milionë euro në muaj dhe afërsisht 3 miliardë euro në vit dhe u shkaktuan mbi 10 miliardë euro dëm ekonomik kompanive që menaxhojnë TV me pagesë. U kryen 89 kontrolle në 15 rajone italiane, por me bashkëpunimin e forcave të huaja policore, u kryen edhe 14 kontrolle në Mbretërinë e Bashkuar, Holandë, Suedi, Zvicër, Rumani dhe Kroaci, ndërsa 102 persona janë vendosur nën hetim. Autoritetet italiane sqaruan se mbi 22 milionë persona në Europë e blenë piraterinë, por përveç rreziqeve si vjedhja e identitetit dhe informacionit bankar, u njoftua nga Prokuroria se ata që shesin dhe blejnë piraterinë lënë gjurmë të pashlyeshme në internet. Prandaj në të ardhmen në Europë do të sanksionohen edhe klientët si dhe do të jenë objekt i veprimeve nga mbajtësit e të drejtave.