Ekziston një destinacion turistik në kontinentin europian ku çmimet janë aq të ulëta sa do të habiteni. Kështu e nis artikullin e saj për Shqipërinë e përditshmja spanjolle “Dimensión Noticias”, e cila rekomandon masivisht vendin tonë. Shqipëria duhet vizituar sipas medias spanjolle, jo vetëm për plazhet e bukura me ujëra të kristalta, por edhe për historinë e saj të pasur dhe arkitekturën. “Imagjinoni të ecni nëpër rrugicat me kalldrëm, të vizitoni kështjellat shekullore dhe të shijoni gatimet tradicionale pa u shqetësuar për shpenzimet. Në Shqipëri ju mund të shijoni kulturën vendase pa vuajtur pasojat e kostove të larta” , shkruan e përditshmja spanjolle “Dimensión Noticias”. Bëhuni gati dhe përgatisni valixhet për pushime, shkruan e përditshmja tjetër spanjolle “El Correo”, e cila më shumë se sa plazheve me ujëra bruz i ka kushtuar vëmendjen udhëtimit nëpër Alpet Dinarike. “A ia vlen të bëni shpenzime të mëdha pyet e përditshmja spanjolle duke përmendur Shqipërinë më pas, si një destinacion të lirë, ku një birrë mund të shijohet me 1 euro. “Keni një vend në Ballkan që ofron plazhe, male, kulturë dhe gastronomi me çmime të përballueshme”, vijon më tej artikulli, që e cilëson vendin tonë si një prej destinacioneve ku vitet e fundit po lulëzon turizmi dhe që duhet vizituar patjetër.