Kryetari I komunës së Preshevës në Serbi, Shqipërim Arifi ka njoftuar publikun se qeveria e Serbisë e ka shkarkuar atë nga detyra. Në një postim në rrjete sociale Arifi akuzon se pas shkarkimit është vendosur që Komuna të drejtohet nga një trupë e komanduar deri në mbajtjen e zgjedhjeve. Arifi e ka cilësuar këtë veprim antishqiptar dhe fashist nga shteti i Serbisë, ndërsa Vuçicin një pasardhës të Millosheviqit, që “shqiptarët i konsideronte qenie inferiore”. Jo vetëm kaq, por ai shkon edhe më tej duke bërë pjesë të komplotit edhe ata që i quan “shqipfolësit serbofilë si dhe disa kompani lokale që bashkëpunojnë me qarqet e errëta të Serbisë”, ku ndër ta edhe një prej rivalëve të tij kryesorë në zgjedhjet e fundit parlamentar deputeti i vetëm shqiptar në parlamentin e Serbisë, Shaip Kamberi. “Ka disa kohë që Vuçiq kërcënon publikisht shqiptarët e Luginës së Preshevës. SHKARKIMI i dhunshëm i imi, mesnatën e mbrëmshme, pa asnjë procedur ligjore dhe asnjë njoftim, ndodh menjëherë pas kërcënimit të fundit publik të Vuçiqit në këtë javë dhe 24 orë pasi u dënova nga Gjykata serbe për vendosjen e flamurit kombëtar shqiptar më 28 Nëntor.” – thotë Arifi në deklaratën e tij. Për shkarkimin të cilin e cilësoi “të dhunshëm”, Arifi thotë se ka lajmëruar partnerët ndërkombëtarë, Shtetet e Bashkuara të Amerikës dhe Bashkimin Evropian, ndërsa lajmëron se do t’i japë fund politikës aktive në Luginë, por premton se luftën për të drejtat themelore të shqiptarëve do ta ngrejë një nivel edhe më lart. Pamjet: AFP