Presidenti amerikan Joe Biden pritet të nënshkruajë një urdhër ekzekutiv që do të kufizojë ndjeshëm numrin e personave që kërkojnë azil në kufirin SHBA-Meksikë. Sipas zyrtarëve të administratës, të cilët citon Zëri i Amerikës në një artikull të tijin, me nënshkrimin e këtij urdhri, kufiri do të mbyllej menjëherë sapo hyrjet ditore të shkonin në 2 mijë e 500 vetë. Presidenti Biden pritet ta nxjerrë urdhrin ekzekutiv bazuar në nenin ‘212 pika f’ të ligjit të miratuar para 72 vitesh mbi Imigracionin dhe Shtetësinë, i cili i jep këtij të fundit kompetenca të gjera për të bllokuar hyrjen në vend të emigrantëve, pavarësisht nga lloji i vizave, kur një gjë e tillë besohet se “mbron interesat e Shteteve të Bashkuara”. Ish-Presidenti Donald Trump u mbështet tek ky nen për disa nga veprimet e tij më të ashpra mbi emigracionin, përfshirë të ashtuquajturin "ndalimi i myslimanëve", kur ndaloi hyrjen në SHBA, të shtetasve nga shtatë vende me shumicë myslimane, apo kur zbatoi politikën e "tolerancës zero" për kalimin e paligjshëm të kufirit. Nëse fiton zgjedhjet në nëntor, Trump ka deklaruar se do t’i rikthehet politikës së vijës së ashpër mbi emigracionin.