Një hetim i gjerë i BBC-së ka zbuluar se rrjete të kontrabandës së emigrantëve po përdorin biznese të regjistruara në Mbretërinë e Bashkuar për të menaxhuar pagesat e kalimeve ilegale me gomone përmes Kanalit Anglez. Hetimi hedh dritë mbi mënyrën se si funksionon infrastruktura financiare e këtyre grupeve kriminale dhe si fondet e emigrantëve kalojnë përmes kompanive dhe individëve të ndryshëm përpara se të mbërrijnë tek kontrabandistët. Gazetarët e BBC-së, përmes një operacioni të fshehtë që zgjati tre muaj, dokumentuan takime me kontrabandistë në veri të Francës dhe me persona të lidhur me ta në Londër. Sipas raportimit, emigrantëve u ofrohej mundësia të paguanin mijëra paund për kalimin drejt Britanisë duke përdorur llogari bankare të kompanive britanike ose duke dorëzuar para cash në biznese që vepronin normalisht në publik. Hetimi nisi në kampin e emigrantëve në Francën veriore, një zonë e njohur si pikënisje për shumë tentativa kalimi drejt brigjeve britanike. Gazetarët u paraqitën si emigrantë që kërkonin të kalonin Kanalin me një fëmijë. Brenda pak minutash nga mbërritja në kamp, ata u kontaktuan nga persona që ofronin vende në gomone, duke treguar se rrjeti i kontrabandës funksiononte hapur dhe me organizim të qartë. Njëri prej kontrabandistëve, i cili përdorte emrin “Zia”, u tha gazetarëve se pagesat mund të kryheshin në Mbretërinë e Bashkuar përmes pikave të këmbimit valutor ose bizneseve të tjera.