Ndërsa prej vitesh po përballet me agresionin rus, Ukraina është përfshirë nga një krizë e fortë politike dhe protesta masive, pas vendimit të presidentit Volodymyr Zelensky për të shkarkuar ministrin e Mbrojtjes, Mykhailo Fedorov. Në një konferencë për shtyp në Kiev, Zelensky mbrojti vendimin e tij dhe konfirmoi prishjen e raporteve mes Ministrisë së Mbrojtjes dhe udhëheqjes së lartë të ushtrisë në vend. Ai tha se duhet të zgjidhte mes ministrit dhe ushtrisë. Gjatë konferencës me kryeministrin britanik, Keir Starmer, Zelensky u shpreh se kishte pasur një bisedë të vështirë mes ministrit dhe komandantit të përgjithshëm të ushtrisë. Vendimi i Zelenskyy për të mbështetur shefin e ushtrisë ka zemëruar shoqërinë civile dhe ka zhgënjyer partnerët e huaj të Ukrainës. Më shumë se 1,000 protestues u mblodhën jashtë zyrës presidenciale në Kiev të enjten, duke mbajtur pankarta në mbështetje të Fedorov. Kjo është hera e dytë që nga pushtimi i Ukrainës nga Rusia, në vitin 2022, që një numër kaq i madh njerëzish dalin në protesta kundër qeverisë së Zelenskyt. Fedorovi, 35 vjeç, ishte emëruar ministër i Mbrojtjes vetëm në janar të këtij viti, por kishte marrë shumë vlerësime lidhur me përpjekjet në reformimin e ministrisë që drejtonte, forcimin e luftës kundër korrupsionit dhe përdorimin e analizës së të dhënave për të përmirësuar performancën e forcave ukrainase në vijën e frontit.