Komisioni Administrativo-Territoriale e mbylli misionin 9-mujor pa dakordësi mes palëve. Mazhoranca ka vendosur ta bëjë reformën territoriale, edhe pa praninë e opozitës, e cila braktisi mbledhjen e fundit, pasi iu rrëzua kërkesa për shtyrjen e punimeve të komisionit. Bashkëkryetari socialist, Arbjan Mazniku, prezantoi raportin, që synon uljen e numrit të bashkive, nga 61 që janë aktualisht, si dhe ndarjen në rajone. “Ky skenar parashikon një reduktim të vogël të numrit të bashkive duke bashkuar njësi të vogla pa masë kritike me qendra më të forta fqinje. Së pari kështu konsolidojmë bashkitë, i japim atyre madhësinë dhe kapacitetet njerëzore që u mungojnë dhe e dyta na lejon në këtë moment të kapim afaatet elektorale. Harta e re duhet të jetë gati para zgjedhjeve vendore. Krijimi i një mekanizimi funksional rajonalizimi. Shqipëria ka nevojë për një nivel të dytë real qeverisje”. Ndonëse komisioni parlamentar e mbylli mandatin, për Maznikun puna do të vazhdojë deri në verën e 2027-ës, për të rishikuar funksionet dhe kompetencat e bashkive.