Thuajse dy vite nga vrasja e Egli Progës në Pogradec, Prokuroria ka mbyllur zyrtarisht hetimet, duke dërguar si të pandehur 5 persona. Për dy personat kryesorë të përfshirë në ngjarje, Denis Meçe dhe Leonidha Guçe, prokuroria ka komunikuar akuzën "Vrasje me dashje, e kryer në bashkëpunim". Ndërkohë, tre personat e tjerë të pranishëm në ngjarje, Arjan Manellari, Voltan Shkulaku dhe Andi Shkulaku, do të përballen me drejtësinë për "moskallëzim krimi" dhe "veprime që pengojnë zbardhjen e së vërtetës". Ekspertiza mjeko ligjore konfirmoi se 42-vjeçari Egli Proga humbi jetën si pasojë e një hemorragjie cerebrale në cipën e trurit, e shkaktuar drejtpërdrejt nga goditjet me grusht. Kjo provë shkencore u mbështet edhe me dëshmitë e shumta dhe analizimin e kamerave të sigurisë së bizneseve përreth, që filmuan gjithë dinamikën e ngjarjes. Gjykata e Korçës më herët ka caktuar masën e sigurisë “arrest shtëpie” për dy të akuzuarit kryesorë, ndërsa tre të tjerët u hetuan në gjendje të lirë me “detyrim paraqitje”. Kjo masë ka shkaktuar reagime të mëdha për familjarët e viktimës, të cilët që prej ditës së parë kanë akuzuar jo vetëm autorët, por edhe strukturat e policisë lokale për tentativë manipulimi dhe fshehje të ngjarjes.