Policia e Kosovës ka mbyllur gjashtë njësi të “Bankës Kursimore Postare” të Serbisë e që funksiononin ilegalisht brenda territorit të Kosovës. Aksioni u zhvillua në bashkëpunim me Bankën Qendrore, të hënën në katër komunat në veri të Kosovës. “Njësia e Inteligjencës Financiare dhe Banka Qendrore e Kosovës, së bashku me Administratën Tatimore të Kosovës, bazuar në autorizim të prokurorit kompetent, është duke zhvilluar një operacion policor në gjashtë lokacione të katër komunave në veri të Kosovës, e që janë i ashtuquajturi Trezori i Bankës Postare Kursimore (Banka Postanske Stedionice) dhe pesë filialeve të tjera të saj, që kanë vepruar ilegalisht në këtë zonë të Republikës së Kosovës”, thuhet në njoftimin e policisë. Tutje shtohet se operacioni është zhvilluar pa asnjë incident me qëllim vendosjen e rendit dhe ligjshmërisë. Aksioni i Policisë së Kosovës vjen një javë pas përfundimit të fazës tranzitore që Banka Qendrore e vendit dha për çështjen e dinarit. Përmes këtyre degëve të bankës kursimore, Serbia ka ndarë ndihma financiare për serbët e Kosovës, në dinar. Që nga 1 shkurti i vitit 2024, pagesat me para të gatshme dhe transferet bankare sipas rregullores së BQK-së do të kryhen vetëm në valutën euro.