Afro 12 mijë bimë narkotike u asgjesuan nga policia në qarkun e Shkodrës. Aksioni u shtri në zonat malore të Shkodrës, Vaut të Dejës dhe Pukës. Ndërkohë u angazhuan 70 punonjës policie si dhe u përdorën 5 dronë. Gjatë kontrolleve të zhvilluara, bazuar dhe në inteligjencën informative, uniformat blu zbuluan parcela të ndryshme të mbjella me kanabis në disa fshatra. Ndërkohë u arrestua një 59-vjeçar. Ai u ndalua pasi dyshohet se kishte kultivuar 120 bimë narkotike në fshatin Kabash në Pukë. Nga ana tjetër hetuesit po vijojnë punën për identifikimin dhe kapjen e personave të tjerë të përfshirë në këtë veprimtari kriminale. Kjo ishte faza e dhjetë e operacionit të koduar “Alpe të Pastra” që agjentët e antidrogës ndërmarrin në qarkun Shkodër. Gjatë operacioneve të mëparshme në këtë zonë janë djegur afro 47 mijë rrënjë kanabisi, ndërsa janë arrestuar 3 persona dhe janë shpallur në kërkim 9 të tjerë.