Aeroportet dhe portet e Mbretërisë së Bashkuar do të ndërmarrin greva në datat kryesore në dhjetor, pasi sindikata që përfaqëson ata kërkon që qeveria të kthehet në tryezën e negociatave për pagat dhe kushtet e punës. Grevat do të zhvillohen midis 23 dhe 26 dhjetor dhe nga 28 deri më 31 dhjetor, duke prekur aeroportet e Birmingham, Cardiff, Gatwick, Glasgow, Heathrow dhe Manchester, si dhe Portin e Newhaven. Ky zhvillim vjen në mes të një sërë grevash të vendosura për të goditur udhëtimet festive , me aksione industriale të organizuara nga punonjësit e trenave, autobusëve, etj në prag të Krishtlindjeve dhe gjatë gjithë sezonit të festave. Por protestat nuk kufizohen vetëm në transport, pasi edhe mësuesit, infermierët dhe shumë të tjerë nga sektori publik, kërkojnë paga më të larta dhe negocim të kushteve të punës. Sindikata e Shërbimeve Publike dhe Tregtare tha se ata po ndërmarrin veprimet e tyre për shkak të mosmarrëveshjeve me qeverinë rreth pagave, kërcënimit të shkurtimeve të vendeve të punës dhe ndryshimeve në rregullat e pensioneve. “Vazhdojnë të na thonë se qeveria ka një derë të hapur, por nuk ka kuptim që dera të jetë e hapur nëse nuk ka asgjë pas asaj dere. Sektori publik nuk ka zgjidhje tjetër përveçse të ndërmarrë veprime industriale, sepse anëtarët tanë aktualisht janë duke lënë mënjanë vaktet, ata nuk janë në gjendje të ndezin ngrohjen në shtëpi për shkak të varfërisë në të cilën po jetojnë”, thuhet në deklaratën e tyre. Pamjet: AFP