Ditët e Gushtit po shkojnë drejt fundit, ndërkohë ethet e këtij muaji për Partinë Socialiste e cila qeveris vendin në mandatit e katërt po shtohen. Kjo si pasojë e nisjes të vrullshme të sesionit të ri politik nga Edi Rama, me dy takime të rëndësishme, një që pritet të zhvillohet sot rreth orës 11:30 në Pogradec dhe i radhës ditën e nesërme në po të njëjtin qytet. Në videon e siguruar nga gazetari i Top Channel Muhamed Veliu, shihet kryeministri Edi Rama teksa ka mbërritur i pari në vilën qeveritare në Pogradec. Më pas ka mbërritur Ulsi Manja, drejtues politik i Dibrës, ku së bashku kanë qëndruar pak minuta dhe më pas janë larguar drejt kafeneve të Pogradecit. Gazetari ka mësuar se ora 11:30 e ditës së sotme do të gjejë të mbledhur në vilën qeveritare të qytetit liqenor 12 drejtuesit politikë të qarqeve bashkë me kryetarët socialistë të komisioneve parlamentare. Burime nga PS pohuan se në fokus të këtij takimi do të jetë dokumenti Besa dhe një tjetër dokument njohur si “Prania e Besës” dorëzuar grupit parlamentar socialit në fund të korrikut. Rama nga ky takim pritet të marrë refleksione mbi këto dy dokumente me qëllimin final pasurimin dhe shkuarjes drejt një dokumenti final dhe pa anashkaluar përgatitjet për zgjedhjet lokale të 2027. Mbrëmja e kësaj të Diele do ta gjejë Ramën, drejtuesit politikë, kryetarët e komisioneve parlamentare dhe ministrat në një darkë, e cila me gjasë do t’i shërbejë shtensionimit të etheve të gushtit, përpara “provimit të performancës” të hënën. Po në Pogradec në vilën qeveritare në atë që njihet si një “retreat” mbledhje informale e qeverisë, ministrat do të raportojnë për ecurinë e dikastereve të tyre për periudhën Janar-Gusht 2026.