Një histori e jashtëzakonshme mbijetese ka rikthyer shpresën në Nepal, vendi i cili po përballet me njërën prej katastrofave natyrore më të rënda të viteve të fundit. Ekipet e kërkim-shpëtimit kanë arritur të nxjerrin të gjallë nga rrënojat një grua nepaleze, plot 10 ditë pasi shtëpia e saj u fundos nën një shtresë të dendur balte dhe mbeturinash. Anëtarët e Forcës së Policisë së Armatosur të Nepalit shpërthyen në brohoritje dhe lot gëzimi teksa transportuan një në vend të sigurt 64-vjeçaren Chandrika Shrestha, e cila u gjet e gjallë në distriktin e Nuëakot-it. Një video e shpërndarë nga ushtria tregonte se si shtëpia e saj ishte shkatërruar, ndërsa dukej vetëm çatia. Gruaja u pikas rastësisht gjatë pastrimit të zonës dhe u nis me urgjencë me një helikopter ushtarak drejt kryeqytetit Katmandu për trajtim të specializuar mjekësor. Ky shpëtim pason një tjetër mrekulli, atë të një burri kinez që u gjet gjallë brenda një tuneli hidroenergjetik në distriktin fqinj të Rasuëa-s. Ekipet e emergjencës po punojnë pa pushim që prej 26 gushtit, dita kur një mur gjigant uji dhe balte, i ngjashëm me një cunami, përshkoi kufirin mes Kinës dhe Nepalit pas shkëputjes së një akullnaje. Agjencia kombëtare e fatkeqësive natyrore konfirmoi se deri më tani në Nepal janë gjetur 1,344 trupa të pajetë, ndërsa rreth 5,000 persona të tjerë rezultojnë zyrtarisht të zhdukur. Në anën tjetër të kufirit, në territorin e Kinës, mediat shtetërore raportojnë për 31 të vdekur dhe 531 të zhdukur. Ky bilanc e çon numrin total të viktimave të konfirmuara në 1,375 persona, ndërsa fati i më shumë se 5,500 të tjerëve nuk dihet.