Mbi 80 mijë njerëz janë evakuuar nga Franca dhe Spanja, për shkak të situatës dramatike me zjarret. Autoritetet franceze urdhëruan evakuimin total, nga toka dhe deti, në një prej vendeve më të njohura turistike në vend, ndërsa Madridi shpalli emergjencën kombëtare. Autoritetet në Francën jugperëndimore evakuuan gjithë gadishullin Cap Ferret, në bregdetin e Atlantikut, për shkak të një zjarri intensiv dhe të paparashikueshëm, që ka djegur më shumë se 12 500 hektarë tokë. Rreth 800 zjarrfikës dhe disa aeroplanë po luftojnë me flakët në zonë, por situata vijon të jetë e rrezikshme. Autoritetet raportuan për të paktën 80 shtëpi të djegura në gadishullin e njohur francez, i zgjedhur për pushime nga francezë e personazhe të njohura ndërkombëtare. Nga ana e saj, qeveria e Spanjës shpalli emergjencën e parë kombëtare në Madrid, mes nxehtësisë përvëluese dhe kushteve të thata në pjesën më të madhe të Evropës jugore. "Ky është zjarri më i keq në historinë e rajonit tonë", tha udhëheqësja rajonale e Madridit, duke përshkruar situatën si të paprecedentë: me temperatura jashtëzakonisht të larta dhe erëra të pamëshirshme". Të dy vendet kërkuan ndihmën e Bashkimit Evropian. Shkencëtarët thonë se ndryshimi i klimës po shkakton ngjarje më të shpeshta dhe më ekstreme të motit, duke nxitur zjarret dhe duke çuar në mijëra vdekje. Evropa po ngrohet me rreth dyfishin e normës mesatare globale.