Vendimi i Komisionit Qendror të Zgjedhjeve për moscertifikimin e saj për zgjedhjet lokale të tetorit në Kosovëm është për Listën Serbe një lëvizje “e paligjshme dhe diskriminuese” e kryeministrit në detyrë të Kosovës, Albin Kurti. Forca më e madhe politike e serbëve të Kosovës, e cila gëzon mbështetjen e beogradit zyrtar, pohoi se e ka ankimuar këtë vendim. Kryetari i Listës Serbe, Zllatan Ellek nënvizoi se megjithëse Zyra për partitë politike rekomandoi certifikimin, KQZ-ja sërish vendosi të refuzonte. “Është e qartë se Kurti dhe anëtari i tij në KQZ, para së gjithash mendoj për Alban Krasniqin, bashkëshortin e [ministres në detyrë të Drejtësisë] Albulena Haxhiut, nuk mund t’ia falin Listës Serbe faktin që ajo nuk u zgjodh në pozitën e kryetares së Kuvendit të Kosovës”, tha ai. “Ky reagim i Albin Kurtit është, para së gjithash, për të fituar pikë të lira politike. Ne do të ndërmarrim të gjitha veprimet ligjore që janë të nevojshme, me qëllim që para së gjithash të sigurojmë certifikimin e të gjithë kandidatëve, si për kryetarë komunash, ashtu edhe për asamblistë”, shtoi Ellek. Sipas Ellekut, sa i përket përfaqësimit politik të serbëve në Kosovë, në njërën anë është partia e tij, ndërkaq në anën tjetër janë “disa parti jo tamam serbe që i mban Albin Kurti”, duke shtuar se me moscertifimin e Listës Serbe, Kurti “dëshiron ta ndajë trupin politik serb”. Igor Simiq nga Lista Serbe tha se ankesa ndaj vendimit të KQZ-së ishte hartuar tashmë për t`iu dërguar Panelit Zgjedhor për Ankesa dhe Parashtresa. Gjatë mbledhjes së Komisionit Qendror të Zgjedhjeve më 21 gusht, anëtarët e Lëvizjes Vetëvendosje votuan kundër certifikimit të Listës Serbe për zgjedhjet lokale të 12 tetorit, duke argumentuar se ka eksponentë që janë pjesë edhe e strukturave paralele serbe, teksa cilësuan këtë parti edhe si “dorë e zgjatur” e presidentit serb, Aleksandar Vuçic, në Kosovë.