Të gjithë liderët e BE-së, me një përjashtim, kanë mbështetur një deklaratë që rikonfirmon “mbështetjen e palëkundur të bllokut për integritetin territorial të Ukrainës”. Përjashtim bën kryeministri i Hungarisë Viktor Orban. Nuk është një lajm befasues, pasi ai është shpesh një “gjemb në krahun e BE-së” dhe nuk pajtohet me liderët e tjerë evropianë. Orban është dashamirës ndaj presidentit rus, Vladimir Putin dhe vitin e kaluar u takua me të për të diskutuar një marrëveshje të mundshme paqeje në Ukrainë, shumë kohë përpara raundit të fundit të bisedimeve për armëpushimet e nisura nga kthimi i Trump në Shtëpinë e Bardhë. Krerët e bllokut janë mbledhur sot në Bruksel për një takim dyditor ku pritet të tregojnë se “Bashkimi Europian beson tek ideja e ‘paqes përmes forcës’, çka nënkupton që Ukrainë të jetë në pozicionin më të fortë të mundshëm, dhe kapacitetet e saj ushtarake janë elementët kryesorë”. Teksti paraprak i deklaratës tregon se BE-ja “mbetet e përkushtuar, në koordinim me partnerët dhe aleatët e linjës së njëjtë, për të ofruar mbështetjen e duhur për Ukrainën dhe njerëzit e saj, teksa ushtron të drejtën e vet për vetëmbrojtje kundër agresionit rus të Rusisë”. Drejt Brukselit është nisur edhe presidenti ukrainas Volodimur Zelenesky, i cili pati së fundi një telefonatë me presidentin amerikan Donald Trump.