Pesë shtetas amerikanë që mbaheshin të ndaluar në Iran, arritën në Katar të hënën, në shkëmbim të pesë iranianëve të ndaluar në Shtetet e Bashkuara. Marrëveshja për shkëmbimin e të burgosurve mes dy vendeve kundërshtare u ndërmjetësua nga Katari. Në marrëveshje gjithashtu përfshihet edhe zhbllokimi i fondeve iraniane prej 6 miliardë dollarësh nga një bankë koreanojugore. Sekretari amerikan i Shtetit, Antony Blinken, tha se ka folur me pesë shtetasit amerikanë të liruar nga Irani pasi kanë arritur në Katar. "Pesë nga shtatë, natyrisht, ishin ndaluar padrejtësisht, ishin burgosur në Iran, disa për vite me radhë, dy të tjerë ishin penguar të largoheshin nga Irani," u tha Blinken gazetarëve në Nju Jork. Sekretari amerikan i Shtetit Antony Blinken falenderoi autoritetet e Katarit, Zvicrës, Koresë së Jugut dhe Omanit që ndihmuan për këtë shkëmbim dhe u zotua në një deklaratë se do të këmbëngulë për "llogaridhënie nga Irani dhe regjimet e tjera për praktikën e egër të ndalimit të paligjshëm". Marrëveshja për shkëmbimin ka krijuar tashmë hapësira të reja kritikash ndaj Presidentit Biden nga republikanët dhe të tjerë që thonë se administrata e tij po ndihmon ekonominë e Iranit në një kohë kur Irani përbën një rrezik të madh për forcat amerikane dhe aleatët në Lindjen e Mesme. Marrëveshja mund të ketë edhe pasoja tek fushata e tij elektorale për t'u rizgjedhur president. Pamjet: AFP