Pas publikimit të skemës së vjedhjes me mikrokreditë, Banka e Shqipërisë revokoi të enjten licencën për dy subjekte financiare jo banka. Bëhet fjalë për licencën e shoqërisë “Final” sh.p.k. dhe të shoqërisë “Micro Credit Albania” sh.p.k. Vendimi i BSH vjen pasi Prokuroria e Tiranës njoftoi nisjen e hetimit ndaj 9 personave, mes tyre dhe administratores së Micro Credit Albania, Elda Ibro, dhe administratorit të subjektit “Final’ Arben Meskuti. Ata dyshohen se kanë përdorur licencat si kompani mikrokrediti dhe përmbarues gjyqësorë për të zhvatur mijëra qytetarë përmes skemave të rifinancimit me kushte të këqija të kredive të vjetra apo përmes shantazhimit të tyre, duke iu bllokuar pronat e luajtshme apo të paluajtshme. “Jemi në kushtet kur nuk plotësojnë më kriterin e reputacionit të lartë etik, i cili ndër të tjera konsideron që individi të mos jetë në ndjekje penale. Banka e Shqipërisë po adreson kuadrin ligjor dhe rregullativ lidhur me administrimin në vijimësi të portofolit të klientëve të shoqërive “Final” dhe “Micro Credit Albania”-thuhet në njoftimin zyrtar. Prokuroria e Tiranës njoftoi të enjten se tre shoqëritë përmbarimore, Zig, Star FS dhe Flash dhe dy shoqëritë Micro Credit Albania dhe Adca dyshohen se kanë vepruar si një etnitet i vetëm, duke aplikuar kamata vonese nga 2 deri në 8 për qind. Prokuroria po heton gjithashtu për grup të strukturuar kriminal, si edhe të shpërdorimit të detyrës, pasi dyshohet se janë prekur mijë individë të prekur nga ky skandal.