Një nga nxënëset që i mbijetoi sulmit të armatosur në një shkollë në periferi të Bangkokut ka rrëfyer momentet e tmerrit që përjetoi, ndërsa pa mësuesen e saj të qëllohej para syve. “Isha përpara mësueses kur ajo u qëllua. Ajo po më fliste kur autori u shfaq dhe e qëlloi”, tregoi nxënësja e klasës së tetë për BBC Neës. Ajo kujton se pas të shtënave nuk mund të shihte pothuajse asgjë. “Nuk shihja gjë tjetër veç një reje pluhuri. Ai ecte nga një klasë në tjetrën. Tavolina ime ishte shumë afër mësueses. M’u desh të ngjitesha mbi gardhin e shkollës për t’u arratisur bashkë me shokët e tjerë”, tha ajo. E tronditur nga ngjarja, vajza priti jashtë shkollës së bashku me nënën e saj. Sipas kësaj të fundit, fjalët e para që i tha vajza pas shpëtimit ishin: “Mendova se nuk do të të shihja më kurrë.” Rrëfimi i saj është një nga dëshmitë më të forta të masakrës që tronditi Tajlandën, ku një nxënës hapi zjarr në shkollë pasi kishte vrarë më parë gjyshërit e tij. Sipas autoriteteve tajlandeze, autori i dyshuar vrau fillimisht gjyshërit në banesën e tyre dhe më pas mori armën, e cila ishte e regjistruar në emër të gjyshit të tij. Më pas ai u drejtua për në shkollën ku studionte, në periferi të Bangkokut, ku hapi zjarr ndaj mësuesve dhe nxënësve. Hetimet paraprake tregojnë se gjatë sulmit ai qëlloi 26 fishekë, ndërsa në vendngjarje policia gjeti edhe 34 fishekë të tjerë. Forcat e rendit dhe ekipet e emergjencës ndërhynë menjëherë, duke evakuuar të mbijetuarit dhe transportuar të plagosurit në spital. Ministria e Shëndetësisë bëri të ditur se nga sulmi mbetën të plagosur 22 persona, ndërsa nëntë prej tyre ndodhen në gjendje kritike. Disa nga të lënduarit nuk u goditën nga plumbat, por u plagosën gjatë panikut dhe përpjekjeve për t'u larguar nga shkolla. Ndërkohë, zëvendësministri i Brendshëm konfirmoi se pesë mësues humbën jetën në sulm, duke korrigjuar bilancin fillestar që fliste për gjashtë viktima. Policia vijon hetimet për të zbardhur motivin e kësaj masakre, ndërsa zëdhënësi i policisë, Trairong Phiëphan, deklaroi se arma e përdorur dyshohet se i ishte marrë një anëtari të familjes së autorit. Autoritetet po mbledhin prova dhe dëshmi për të sqaruar plotësisht rrethanat e një prej sulmeve më të rënda që ka tronditur vendin vitet e fundit.