Pas ngjarjes të rëndë të ndodhur mbrëmjen e djeshme në Kosovë, ku pas një sulmi ndaj një autobusi humbën jetën shoferi dhe dy nxënës, ministri Sveçla dhe drejtori i Policisë kanë dalë në një deklaratë për mediat. Ministri i Punëve të Brendshme, Xhelal Sveçla, shpreh për mediat se po hetohen disa pista për vrasjen e ndodhur në Gllogjan të Deçanit, duke deklaruar më tej se janë marrë informacione të ndryshme lidhur me këtë rast dhe ngjarja po trajtohet me kujdes nga ana e policisë së Kosovës. Sveçla u bën thirrje qytetarëve të Kosovës që t’i drejtohen policisë për çfarëdolloj informacioni të mundshëm, në mënyrë që ky rast të zbardhet sa më shpejt dhe të bëhet e mundur arrestimi i autorit të maskuar që vrau me kallashnikovë tre persona dhe plagosi një tjetër. “Mund të deklarojë se tashmë kemi informacione të ndryshme të ardhura në rrugë të ndryshme të cilat Policia e Kosovës nën direktivat e Prokurorisë është duke i trajtuar një për një. Janë duke u trajtuar disa pista të cilat të gjitha kapacitetet e Policisë janë duke i eliminuar apo duke i hetuar. Unë po ashtu nuk po them bëjë ftesë, unë bëjë ultimatum vrasësit që të dorëzohet për shkak se për çdo ditë ai rëndon të tjerët. E dimë shumë mirë se kushdo që ndihmon vrasësin implikohet në vepër të rëndë penale, nuk bëhet më fjalë për çfarëdo lloj solidariteti me vrasësin e dy nxënësve dhe shoferit të autobusit. Prandaj, sa më parë që dorëzohet aq më mirë edhe për rrethin e tij, por aq më mirë edhe për qytetarët e gjithë Kosovës”, tha Sveçla. Ndërkaq, drejtori i përgjithshëm i policisë në Kosovë, Samedin Mehmeti tha për mediat se aktualisht po bëhen ekzaminimet, pastrimi i terrenit dhe po kryhen hetime të detajuara në zonën e ngjarjes. Ai tha se dyshohet që vepra është kryer nga një person por më tej shtoi se nuk përjashtohet fakti që mund të ketë pasur edhe bashkëpunëtorë të tjerë. “Policia e Kosovës është duke bërë ekzaminimet, aktualisht jemi duke bërë pastrimin e terrenit, shqimin detajuar të rrethinës së ngjarjes, përfshirë këtu edhe rrethinat apo pjesët anësore të vendit të ngjarjes, përkatësisht pjesët ku potencialisht mund të ketë ndonjë provës shtesë. Fatkeqësisht kemi pas një mot shumë të keq gjatë gjithë kohës që na ka penguar në këtë shiqim, na ka penguar që disa mjetet teknike dhe mjete të tjera që ndihmojnë në gjetjen e gjurmëve të ndryshme. Është dashtë që pastrimi i terrenit të filloj me vonesë. Gjitha njësitet janë në vend të ngjarjes duke e pastruar terrenin, mirëpo aktualisht jemi duke u përballur me një numër të konsiderueshme të informacioneve rreth rastit, kemi sjellë njësi shtesë dhe ekspertë të ndryshme të niveleve të ndryshme operative dhe hetimore që t’i trajtojnë këto informacione dhe të bëjnë ekzaminimet më të shpejtë të evidencave dhe provave që i kemi gjetur në vend të ngjarjes apo që mund të gjenden gjatë pastrimit të vendit të ngjarjes”, tha Mehmeti. Sa i përket motiveve që e çuan autorin të ndërmarrë këtë akt të tmerrshëm, Mehmeti tha se ende është herët për të folur.