Gjashtë persona humbën jetën nga të shtënat me armë zjarri në një qendër kujdesi për të rinjtë në Gjermani. Ngjarja tragjike u regjistrua në qytetin Stade, afër Hamburgut, ku brenda qendrës strehohen edhe nëna me fëmijë. Nga të shtënat katër gra dhe një burrë humbën jetën në vendngjarje, ndërsa një tjetër në spital. Gjithashtu, autoritetet raportojnë edhe për të plagosur, disa prej tyre në gjendje të rëndë. Policia arrestoi autorin e dyshuar të krimit dhe dy të tjerë, një prej tyre grua, të cilët po merren në pyetje dhe pritet t’i nënshtrohen ekzaminimit mjeko-ligjor. Autoritetet gjermane thanë se të gjithë personat u qëlluan brenda ndërtesës dhe situata në vendngjarje ishte kaotike, ndërsa iu bënë thirrje qytetarëve të shmangnin zonën. Mediat gjermane raportuan se në momentin e të shtënave kishte edhe fëmijë në një çerdhe aty pranë. Sipas informacioneve nga autoritetet e sigurisë në Gjermani, incidenti nuk ka gjasa të jetë një akt politik apo terrorist, por është një tragjedi familjare. Media gjermane “Der Spiegel” raporton se dyshohet për një krim pasioni. Autori i dyshuar tentoi të largohej me makinë pas masakrës, së bashkua me një grua, por u rrethua dhe neutralizua nga policia, e cila hapi zjarr drejt mjetit, duke e ndaluar. Autoritetet në Gjermani vijojnë hetimet për të zbardhur shkaqet e vërteta të këtij krimi të rëndë.