Kjo deklaratë e Sali Berishës ndaj ambasadorit të Bashkimit Evropian në Tiranë, Silvio Gonzato, e zhvendosi debatin për ligjin e barazisë gjinore edhe përtej kufijve. Komisionerja për Zgjerim e Bashkimit Evropian, Marta Kos, dënoi gjuhën e ashpër ndaj kryediplomatit Gonzato, duke e cilësuar një sulm të papranueshëm. "Barazia gjinore dhe mosdiskriminimi janë pjesë integrale e ligjit të BE-së. Përputhja me të është pjesë e procesit të pranimit në BE. Kjo nuk është një kërkesë private e Ambasadorit të BE-së në Shqipëri. Çdo sulm ndaj tij është i papranueshëm”. Nga ana e saj, qeveria shqiptare kërkoi ndjesë për deklaratat e forta të kryedemokratit Berisha. Kryeministri Edi Rama e cilësoi ligjin për barazinë gjinore fisnik dhe të përafruar me parimet e Bashkimit Evropian, ndërsa Berishës iu përgjigj me një shprehje popullore. “Kërkojmë ndjesë për mënyrën fyese me të cilën një ligj shumë fisnik, plotësisht i përafruar me parimet e BE-së për barazinë gjinore dhe mosdiskriminimin, është keqpërdorur për të shtrembëruar perceptimin publik, si dhe për mënyrën se si Ambasadori i BE-së është shfrytëzuar për një qëllim kaq të ulët. Megjithatë, siç themi ne në shqip: Le të lehin qentë, karvani ecën përpara”.