Gjykata Kushtetuese ka dalë me një deklaratë lidhur me shqyrtimin për më shumë se tetë orë marrëveshjem Itali – Shqipëri për emigrantët, pas kërkesës së 30 deputetëve të grupit Bardhi-Berisha që pretendojnë se ajo është antikushtetuese. Përmes një njoftimi, Kushtetuesja ka kërkuar prova nga qeveria dhe si e tillë kërkohet traktati i Miqësisë dhe Bashkëpunimit ndërmjet Republikës së Shqipërisë dhe Republikës së Italisë i vitit 1995, mbi të cilën pretendohet se është nënshkruar marrëveshja midis kryeministrit Edi Rama dhe homologes së saj italiane, Giorgia Meloni. Ratifikimi I marrëveshjes u pezullua menjëherë pasi Kushtetuesja mori në shqyrtim kërkesën e grupit të 30 deputetëve, duke sjellë edhe anulimin e votimit të planifikuar në Parlament më 14 dhjetor. Gjykata Kushtetuese ka njoftuar po ashtu se seancën e radhës në lidhje me këtë cështje do ta zhvillojë më 24 janar, ora 11:30. Në marrëveshjen dypalëshe mes Shqipërisë dhe Italisë parashikohet që çdo muaj për 5 vjet rreth 3 mijë emigrantë të strehohen në Gjardër të Lezhës; por nëse kjo do të lejohet apo jo, pritet vendimi i Gjykatës Kushtetuese.