Top Channel/ Marrëveshja mes Kosovës e Serbisë! Kurti: bazë për avancim drejt njohjes së ndërsjellë

Kryeministri i Kosovës, Albin Kurti, ritheksoi të dielën se kishte qenë i gatshëm të nënshkruajë më 27 shkurt marrëveshjen themelore për normalizimin e marrëdhënieve me Serbinë, që sipas tij përmban një avancim drejt njohjes së ndërsjellë mes dy shteteve. Ai i bëri këto komente në një videomesazh drejtuar një Forumi të Universitetit të Manheimit në Gjermani, ku tha se shpreson që refuzimi i presidentit të Serbisë, Aleksandar Vuçiç, që të nënshkruante në Bruksel nuk është shenjë se ai nuk pajtohet me përmbajtjen e marrëveshjes. Më 27 shkurt kryeministri i Kosovës, Albin Kurti dhe presidenti i Serbisë Aleksandar Vuçiç, i thanë po një plani të mbështetur nga Shtetet e Bashkuara, por nuk pati nënshkrim dokumenti për shkak të mospajtimeve për zbatimin e tij, që do të kërkojë më shumë bisedime. “Ne besojmë se Marrëveshja themelore mes Kosovës dhe Serbisë përmban një avancim drejt njohjes së ndërsjellë mes dy shteteve. Besojmë se normalizimi i plotë i marrëdhënieve kërkon një njohje të ndërsjellë në qendër të marrëveshjes, si dhe respektim për të drejtat e pakicave në të dy shtetet. Siguria dhe paqja në rajon e Evropë është mese e nevojshme. Ne jemi të gatshëm të bëjmë përparim edhe përkundër sfidave të mëdha”, tha të dielën kryeministri Kurti.