Qeveria i dërgon për ratifikim Parlamentit marrëveshjen e arritur me Italinë për njohjen reciproke të sigurimeve shoqërore. Projektligji për njohjen e ndërsjelltë të pensioneve pritet jetë pjesë e rendit të ditës në seancën e ardhshme plenare në Kuvend. Marrëveshja për njohjen e kontributeve të sigurimeve shoqërore u arrit më 6 shkurt mes Shqipërisë dhe Italisë, nënshkrimi i së cilës u bë në Romë nga ministri për Evropën dhe Punët e Jashtme, Igli Hasani si dhe ministri i Jashtëm i Italisë, Antonio Tajani. Janë rreth 550 mijë shtetas shqiptarë dhe rreth 20 mijë shtetas italianë, që përfitojnë nga zbatimi i marrëveshjes e cila do të sigurojë bashkimin e periudhave kontributive, duke bërë të mundur që asnjë vit pune të mos humbasë. Finalizimi i kësaj marrëveshjeje ofron për shumë persona një siguri dhe një perspektivë pozitive për të ardhmen. Referuar marrëveshjes, qytetarët në të dyja shtetet përfitojnë për pension pleqërie, pension invaliditeti dhe pension familjar, sigurimin për përfitimin për sëmundjet dhe barrëlindjen dhe sigurimin e papunësisë. Shqipëria dhe Italia kishin rreth 15 vite që negocionin marrëveshjen që garanton të drejtat e punonjësve shqiptarë në Itali dhe të punonjësve italianë në Shqipëri. Shtetet me të cilat Shqipëria ka marrëveshje në fushën e sigurimeve shoqërore janë: Hungaria, Kanadaja, Turqia, Belgjika, Luksemburgu, Maqedonia e Veriut, Republika Çeke, Republika Federale e Gjermanisë, Austria, Kroacia dhe Kosova. Kësaj liste i shtohet edhe Italia, me hyrjen në fuqi të marrëveshjes. Ndërkohë që janë në proces marrëveshjet në fushën e sigurimeve shoqërore me Holandën, Rumaninë, Greqinë dhe Francën.