Presidenti i Turqisë, Recep Tayyip Erdogan, I bëri thirrje Rusisë që të përfshihet në bisedimet për marrëveshjen e eksporteve të drithërave ukrainase përmes Detit të Zi. Në mbyllje të samitit të G20-ës në Nju Delhi që u mbajt këtë të dielë, Erdogan njoftoi se do të zhvillohet një tjetër takim rreth kësaj çështjeje mes përfaqësuesve nga Rusia, Ukraina dhe Kombet e Bashkuara, por pa treguar datën dhe vendin e saktë se ku do të mbahet. OKB-ja dhe Turqia e ndërmjetësuan marrëveshjen për drithërat vitin e kaluar, e cila mundësonte kalimin e sigurt të anijeve civile përmes Detit të Zi, por ajo dështoi pasi Moska u tërhoq në korrik. Nga prishja e marrëveshjes, ushtria ruse i ka sulmuar vazhdimisht portet ukrainase ku mbahet drithi I magazinuar. Ndërkohë Kievi i ka cilësuar këto sulme si përpjekje cinike të Rusisë për t’ia dëmtuar asaj eksportin dhe për ta minuar sigurinë e ushqimit global. Nga ana tjetër Erdogan pas takimit që pati me homologun e tij rus tha se shumë shpejt palët mund të arrijnë një tjetër dakordësi për të zgjatur marrëveshjen.