Ashtu siç pritej, presidenti i sapozgjedhur, Donald Trump, ka emëruar zyrtarisht të Marco Rubio në pozicionin e sekretarit të Shtetit. "Marco është një udhëheqës shumë i respektuar dhe një zë shumë i fuqishëm për lirinë. Ai do të jetë një avokat i fortë për kombin tonë, një mik i vërtetë për aleatët tanë dhe një luftëtar i patrembur që nuk do të tërhiqet kurrë para kundërshtarëve tanë”, ka thënë Trump në një deklaratë. Senatori nga Florida, Marco Rubio, ka thënë se do të sjellë "paqen përmes forcës". “Udhëheqja e Departamentit të Shtetit të SHBA-së është një përgjegjësi e jashtëzakonshme dhe unë jam i nderuar nga besimi që presidenti Trump më ka dhënë", ka deklaruar ai. Ai ka pasur gjithmonë në fokus zhvillimet në Ballkan. Gjatë një fjalimi për rolin e Amerikës në botë, në vitin 2011, si senator i Partisë Republikane në SHBA, Rubio qe shprehur se “forcat e armatosura amerikane “ndaluan nazizmin dhe komunizmin” dhe “të këqija të tjera, si spastrimi etnik serb”. Në vitin 2021, Rubio ishte ndër të parët që përshëndetën lejimin për vendosjen e marrëdhënieve diplomatike midis Izraelit dhe Kosovës. Vitin e kaluar, presidentja e Kosovës, Vjosa Osamni, gjatë një vizite në Uashington, u prit nga një grup senatorësh dhe kongresistësh amerikanë, e Marco Rubio ishte në mesin e tyre. Në 2018-tën sakaq, ai pati takuar edhe presidentin e atëhershëm të Kosovës, Hashim Thaçi. Rubio njihet në përgjithësi për qasje të ashpër në politikën e jashtme, sidomos ndaj Kinës dhe Iranit. Pas emërimit, Ministri i Jashtëm i Shqipërisë, Igli Hasani e ka uruar menjëherë Marco Rubion. Me anë të një postimi në X, Igli Hasani thotë se mirëpresin që të forcojnë më tej lidhjet e forta midis Shteteve të Bashkuara të Amerikës dhe Shqipërisë, si dhe ‘të punojmë së bashku, për të promovuar paqen, demokracinë dhe prosperitetin’. Të mërkurën presidenti i zgjedhur Donald Trump ka emëruar edhe Tulsi Gabbard si drejtore të Inteligjencës Kombëtare, ndërkaq kongresmenin Matt Gaetz nga Florida për të qenë Prokurori i Përgjithshëm.