Këshilli i Lartë i Prokurorisë mohon të ketë trysni në përzgjedhjen e drejtuesit të ri të SPAK-ut. Gjatë raportimit në Kuvend për veprimtarinë e KLP-së, kryetarja Mirela Bogdani shpjegoi fazën në të cilën ndodhet konkurrimi për të udhëhequr Strukturën e Posaçme kundër korrupsionit dhe krimit të organizuar si dhe rolin e Këshillit në studimin e kandidatëve. Edhe aludimet për ndërhyrjet e ndërkombëtarëve, Bogdani i hodhi poshtë preferencat dhe zbuloi porositë. Gjatë raportimit në Kuvend, drejtuesja e KLP u përball me kritika. Ishin dy socialistët, drejtuesi i Komisionit të Ligjeve, Ulsi Manja, dhe Fatmir Xhafaj, që nuk i kursyen kritikat e forta për funksionimin e institucionit. Ndërkohë, gjatë paradites së të hënës, Këshilli i Lartë i Prokurorisë miratoi listën me 4 aspirantë që do të garojnë për të pasuar Altin Dumanin. Pas shqyrtimit të dosjeve, Adnan Xholi, Klodian Braho, Doloreza Musabelliu dhe Ervin Gogaj do të përballen me një intervistim publik e më pas kush do të marrë më shumë vota do të shpallet fitues, për të marr detyrën më 19 dhjetor.