Partitë politike shqiptare në Mal të Zi po shkojnë drejt bashkimit zyrtar në një subjekt të vetëm politik- Forumi Shqiptar- cka do të përbënte të parën herë që krijohet një grupim i unifikuar politik i shqiptarëve në nivel shtetëror. Lajmin e përcjell Radio Televizioni i Malit të Zi, i cili citon burime jozyrtare të flasin për një marrëveshje që parashikon bashkimin e Alternativës Shqiptare, Aleancës Demokratike të Shqiptarëve dhe Bashkimit Kombëtar Shqiptar. Ky hap konsiderohet rezultat i sukseseve të arritura përmes bashkëpunimit politik, duke nisur nga qeverisja e plotë në Tuz, deri te rezultati historik në nivel shtetëror me dy mandate deputetësh dhe dy poste ministrore në Qeverinë e Malit të Zi. Po ashtu, në raport përmenden edhe vlerësimet pozitive për punën e ministrave dhe përfaqësuesve të Forumit në ekzekutiv. Burime pranë negociatave bëjnë të ditur se një shtysë të fortë për bashkimin kanë dhënë edhe sondazhet e fundit të opinionit publik, të cilat tregojnë rritje të konsiderueshme të mbështetjes për Forumin edhe në Ulqin, ku kjo forcë politike po afrohet të bëhet subjekti më i fuqishëm shqiptar. Sipas të njëjtave burime, një nga synimet kryesore të Forumit është marrja e drejtimit të komunës së Ulqinit pas zgjedhjeve të ardhshme. Ndërkaq, thuhet se lider i organizatës së bashkuar pritet të jetë Nik Gjeloshaj, ndërsa rol të rëndësishëm në procesin e bashkimit kanë luajtur edhe Ivan Ivanaj dhe Ferhat Dinosha. Ekspertët e cilësojnë këtë zhvillim si konsolidimin më të madh politik të faktorit shqiptar në Mal të Zi që nga shpallja e pavarësisë së vendit.