Vatrat e zjarrit vijojnë të jenë aktive në vendin tonë duke djegur sipërfaqe të mëdha pyjesh. Pushuesit e Shëngjinit këtë të hënë kanë pasur përballë tyre një pamje aspak të këndshme ndërsa pylli mbi mal ishte nën flakë. Prej tre ditësh zjarri në malin e Shëngjinit vijon pa ndërprerje dhe vetëm mesditën e së hënës është bërë e mundur ndërhyrja nga ajri me helikopter. Për të shuar flakët prej disa ditësh janë angazhuar forcat zjarrfikëse me përforcime dhe nga forcat e ushtrisë, por për shkak të terrenit te vështirë dhe erës, vatrat e zjarrit janë përhapur në të gjithë kurorën e malit duke bërë që të digjen pjesa më e madhe e pishave të mbetura. Ky zjarr dyshohet të ketë përparuar nga mali i Rrencit, i cili ra disa ditë më parë. Ndërkohë një situatë problematike paraqitet edhe në Gjirokastër. Paraditen e së hënës një zjarr përfshiu masivin e pishave në hyrje të liqenit të Viroit. Ky zjarr që dyshohet i qëllimshëm u përhap me shpejtësi për shkak të bimësisë së dendur dhe të thatë dhe pranisë së shkurreve favorizuar edhe nga era. Zjarrfikësit e Gjirokastrës janë ndarë në dy drejtime, ndërsa flakët kanë përparuar në Malin e Gjerë gjatë gjithë ditës në një gjatësi prej 8 kilometrash, si dhe në drejtim të fshatit Mashkullore ku rrezikohen dhe banesa. Zjarrfikësit kërkojnë ndërhyrje nga ajri dhe ndihmën e ushtrisë, pasi e kanë të pamundur të arrijnë disa prej zonave. Në raportimin ditor të emergjencave civile bëhet me dije se në 24 orët e fundit 30 vatra zjarri vijojnë të jenë aktive në vend. Ndërkohë 600 trupa janë në terren për të luftuar me flakët dhe 73 mjete zjarrfikëse.