Ministri i Financave, Petrit Malaj, reagoi pas kallëzimit në SPAK nga gjyqtarët, duke theksuar se ka zbatuar ligjin për pagat e tyre. “Të kallëzohesh sepse po zbaton ligjin, nga garantët e barazisë para ligjit!”, shkruan ministri me ironi, ndërsa sqaron se duhet pritur vendimi i Kuvendit. “Arsyeja e kallëzimit: Kemi refuzuar të hapim dyert e thesarit të shtetit për të nxjerrë që aty pa vendim të Parlamentit një volum të konsiderueshëm parash, si shtesë rroge për gjyqtarët dhe prokurorët. Askush nuk do të pengojë adresimin e çështjes së pagave sipas vendimit të Gjykatës Kushtetuese. Kjo do të ndodhë më 17 shtator, kur të miratohet ligji që i jep Ministrisë së Financave të drejtën administrative të veprimit”. Ndërsa publikon me shifra pagat aktuale të gjyqtarëve dhe sa shkojnë ato me rritjen e kërkuar, ministri Malaj shprehet se efekti në buxhetin e shtetit arrin në 40 milionë euro. “Efekti total në buxhetin e shtetit me këto kërkesa është 40 milionë euro shtesë, çdo vit. Por nuk mbyllet këtu. Magjistratët kërkojnë rishikim të pagave për periudhën 2023-2026 me një efekt në buxhetin e shtetit 125 milionë euro”. Më herët, gjatë ditës, reagoi edhe kryeministri Edi Rama, i cili iu kërkoi gjyqtarëve të kallëzojnë edhe atë dhe ministrin e Drejtësisë, pasi qëndrimi për pagat është konsultuar me ta.