Një ngjarje e rëndë u raportua në Itali mbrëmjen e të shtunës. Një makinë që po udhëtonte me shpejtësi të lartë përplasi rreth dhjetë këmbësorë, në qendër të Modenës, në Italinë veriore. Incidenti i rëndë u regjistrua në rrugën Emilia, ku 7 persona mbetën të plagosur, 4 prej të cilëve në gjendje të rëndë shëndetësore. Menjëherë pas incidentit, shoferi i makinës, një shtetas me origjinë marokene, ka tentuar të largohet nga vendngjarja në këmbë, por është kapur nga kalimtarët. Autori mbante një thikë në dorë dhe ka tentuar të qëllojë njërin prej qytetarëve, që ndërhynë për ta neutralizuar. Ndërkohë dëshmitarët që ishin prezentë në momentin e përplasjes, thanë se makina po ecte me shpejtësi të lartë, mbi 16- km në orë, kur papritur është futur në trotuar, duke marrë përpara turmën e njerëzve. Autoritetet në Itali thanë se shoferi, rreth të 30-ave, kishte goditur fillimisht një biçikletë dhe më pas trotuarin, ku po lëviznin qytetarët, duke iu shkaktuar dëme të rënda shëndetësore disa prej tyre. Rrethanat e incidentit janë ende të paqarta, ndërsa autoritetet po hetojnë nëse ngjarja e shkaktuar ishte i qëllimshëm nga ana e shoferit të automjetit.