Ky është momenti i arrestimit të Presidentit të Venezuelës, Nicolas Maduro, nga forcat e ushtrisë amerikane. Fotografia e diktatorit Maduro me pranga në duar u publikua nga Presidenti i Shteteve të Bashkuara të Amerikës, Donald Trump, e cili e cilësoi kapjen e tij si një ndër operacionet më të mëdha dhe më të suksesshëm. “Fat të mbarë dhe Zoti ju ndihmoftë”! Ishte ky mesazhi i Presidentit Trump për trupat amerikane, në momentin që dha urdhrin për nisjen e operacionit, në orën 10.46 të mbrëmjes sipas orës lokale, i cili përfshinte një seri goditjesh rreth kryeqytetit të Venezuelës. Në operacionin për kapjen e tij u përdorën 150 avionë ushtarakë, nga 20 baza të ndryshme. Anëtari më i vogël i forcave amerikane, që u angazhuan në aksion, ishte një 20-vjeçar dhe më i vjetri ishte 49 vjeç. Forcat amerikane mbërritën në kompleksin e Maduros rreth orës 1:00 të mëngjesit, dhe siç deklaroi Presidenti Trump, diktatori venezuelian bashkë me të shoqen ishin në dhomën e gjumit kur u kapën. Në fjalimin e tij në Florida, pas arrestimit të presidentit venezuelian, Presidenti Trump tha se Shtetet e Bashkuara do të drejtojnë Venezuelën për momentin, ndërsa e quajti Maduron një diktator dhe bos të drogës.