Pas javësh të tëra presioni në rritje të SHBA-së ndaj qeverisë së tij, presidenti venezuelian Nicolás Maduro u shpreh është i hapur për bisedime me Shtetet e Bashkuara mbi trafikun e drogës dhe naftën. Në një intervistë për televizionin shtetëror venezuelian, Maduro tha se ishte gati për dialog me SHBA-në “kudo që të duan dhe kurdo që të duan”. Ai shmangu sakaq një pyetje lidhur me një deklaratë të presidentit Donald Trump, sipas së cilës SHBA kishte goditur një strukturë ankorimi në Venezuelë – sulmi i parë i tillë brenda vendit, që raportohet se është kryer nga CIA. Forcat amerikane kanë sulmuar gjatë tre muajve të fundit disa anije që dyshohet se kontrabandojnë narkotikë përmes Karaibeve dhe Paqësorit lindor. Në total, janë kryer më shumë se 30 sulme ndaj anijeve si pjesë e “luftës kundër drogës” të administratës Trump, me më shumë se 110 persona të vrarë që nga sulmi i parë amerikan ndaj një anijeje në ujëra ndërkombëtare më 2 shtator. Sulmi më i fundit ndodhi të mërkurën, kur dy anije që dyshohej se transportonin drogë u goditën, duke shkaktuar vdekjen e pesë personave në bord, sipas ushtrisë amerikane. Përveç trafikut të drogës, Maduro e bëri të qartë se është i hapur edhe për bisedime mbi naftën dhe emigracionin. Muajt e fundit, Trump është përqendruar në luftimin e hyrjes së drogës në SHBA – veçanërisht fentanilit dhe kokainës. Presidenti amerikan ka dyfishuar gjithashtu shpërblimin për informacion që çon në kapjen e Madurës dhe ka njoftuar se do ta shpallë qeverinë e tij Organizatë Terroriste të Huaj (FTO). Maduro i ka mohuar me forcë akuzat se është drejtues karteli dhe ka akuzuar SHBA-në se po përdor “luftën kundër drogës” si justifikim për ta rrëzuar dhe për të shtënë në dorë rezervat e mëdha të naftës së Venezuelës.