Zjarri masiv që përfshiu zonat perëndimore të Madridit dhe provincën fqinje të Ávilës është teknikisht i stabilizuar, ndërsa autoritetet spanjolle deklarojnë se në terren kanë mbetur “pothuajse fare flakë”. Megjithatë, operacioni nuk konsiderohet i përfunduar. Mbi 40 ekipe tokësore dhe njësi me dronë punuan gjatë natës për të identifikuar dhe shuar vatrat e nxehta, me qëllim shmangien e riaktivizimit të zjarrit. Përmirësimi i situatës u ka mundësuar 24 mijë banorëve të evakuuar të kthehen në shtëpitë e tyre. Autoritetet hoqën gjithashtu urdhrin e qëndrimit brenda banesave për rreth 20 mijë persona të tjerë në rajonin e Madridit. Pavarësisht stabilizimit të situatës pranë Madridit, rreziku në Spanjë mbetet i lartë. Një zjarr vazhdon jashtë kontrollit dhe ka detyruar evakuimin e 14 lokaliteteve, Autoritetet druhen se vala e re e të nxehtit dhe forcimi i erës mund të riaktivizojnë vatrat e stabilizuara.