Presidenti francez Emmanuel Macron i ka bërë thirrje Izraelit të përcaktojë më mirë qëllimet e tij për luftën, duke shtuar se shkatërrimi total i Hamasit do të kërkonte 10 vjet luftë. Gjatë fjalës së mbajtur në një konferencë për shtyp në anë të pjesëmarrjes në samitin e klimës në Dubai, Macron tha se do të udhëtonte në Katar për të “punuar për një armëpushim të ri sa më shpejt të jetë e mundur”. Sipas tij armëpushimi duhet të jetë i përhershëm. Ministri i mbrojtjes sw Izraelit akuzoi të shtunën Hamasin për prishjen e armëpushimit, pasi sipas zyrtarit, grupi militant nuk kishte pranuar të dorëzonte 15 gra dhe dy fëmijë, një kusht i panegociueshëm. Dhe ndërsa lufta vazhdon në Gaza, kryeministri francez u shpreh se Izraeli nuk i ka të qarta qëllimet “Unë mendoj se jemi në një moment kur autoritetet izraelite do të duhet të përcaktojnë më saktë qëllimin e tyre dhe rezultatin përfundimtar që po përpiqen të arrijnë. Çfarë do të thotë shkatërrimi total i Hamasit? A mendon dikush se është e mundur?”, tha Macron. “Nëse është kështu, lufta do të zgjasë 10 vjet dhe nuk mendoj se dikush është në gjendje ta përcaktojë këtë qëllim. Kështu që do të duhet të përcaktohet më mirë,” shtoi ai. Macron ka përsëritur të drejtën e Izraelit për t’u mbrojtur, por ai tha se “e drejta për mbrojtje nuk ju jep, në asnjë mënyrë, të drejtën për të sulmuar civilët”. Forcat e Mbrojtjes së Izraelit kanë thënë se nuk synojnë civilët.