Presidenti francez Emmanuel Macron ndodhet në një nga momentet më sfiduese të karrierës së tij politike, ndërsa presioni për të thirrur zgjedhje të parakohshme ose për të dhënë dorëheqjen po rritet ndjeshëm, madje edhe nga ish-aleatët e tij më të afërt. Ish-kryeministri Édouard Philippe (Eduard Filip), dikur figurë kyçe në ekipin e Macron, ka kërkuar hapur që presidenti të ndërmarrë veprime të qarta sapo të miratohet buxheti i vitit të ardhshëm. Ai theksoi se vendi nuk mund të vazhdojë me pasigurinë politike që ka karakterizuar muajt e fundit. “Edhe 18 muaj të tjerë në këtë gjendje do të ishin të papërballueshëm për Francën”, deklaroi Philippe. Ndërkohë, Gabriel Attal, një tjetër figurë e rëndësishme në kampin presidencial dhe ish-kryeministër, ka shprehur hapur zhgënjimin e tij ndaj mënyrës si po e menaxhon Macron krizën. Ai ka kritikuar “vendosmërinë për të mbajtur kontrollin me çdo kusht”, duke e konsideruar të nevojshme një qasje të re. Situata është përkeqësuar më tej pas dorëheqjes së kryeministrit në detyrë, Sébastien Lecornu (Sebastien Lekorny), dhe kabinetit të tij, vetëm 28 ditë pas emërimit. Media franceze, si gazeta “Le Monde”, ka kritikuar ashpër si Macronin ashtu edhe klasën politike në tërësi, duke e cilësuar situatën një “farsë tragjike” që rrezikon stabilitetin e institucioneve të Republikës. Edhe pse presidenti ka deklaruar se nuk do të japë dorëheqjen para përfundimit të mandatit në vitin 2027, presioni nga të gjitha anët, përfshirë edhe nga e djathta ekstreme dhe e majta opozitare, po e detyron të rishqyrtojë qëndrimin e tij.