Presidenti francez Emmanuel Macron ka riafirmuar mbështetjen e Francës për integrimin evropian të Shqipërisë, duke e cilësuar momentin aktual të marrëdhënieve mes dy vendeve si “veçanërisht pozitiv”. Në një reagim pas takimit me kryeministrin Edi Rama në Paris, Macron vlerësoi bashkëpunimin në fusha si inovacioni, arsimi, kultura dhe turizmi, duke theksuar se këto dëshmojnë lidhjet e ngushta mes Francës dhe Shqipërisë. “Ne duam t’i japim kësaj marrëdhënieje një shtysë të re, ndërkohë që vazhdojmë të forcojmë bashkëpunimin tonë ekonomik dhe mbrojtës. Franca riafirmon mbështetjen e saj për integrimin evropian të Shqipërisë dhe për ndjekjen e reformave të nevojshme për të përparuar në rrugën e saj evropiane” Deklaratat u bënë në kuadër të vizitës së kryeministrit Edi Rama në Francë, me ftesë të presidentit Macron. Kreu i qeverisë shqiptare u prit në Pallatin Elysee, ku zhvilloi një takim të fokusuar në forcimin e partneritetit strategjik mes dy vendeve. Edhe sipas zyrës së shtypit të Kryeministrisë, integrimi i Shqipërisë në Bashkimin Evropian dhe zgjerimi i investimeve franceze në vend ishin në qendër të bisedimeve mes dy liderëve. Takimi i Parisit vjen në vazhdën e kontakteve të shpeshta mes Ramës dhe Macron. Dy liderët janë takuar zyrtarisht në Paris në prill të vitit 2024, si dhe në Tiranë në tetor 2023 dhe maj 2025, ndërsa kanë mbajtur edhe takime të rregullta në formate multilaterale dhe komunikime telefonike. Vizita e kryeministrit Rama në kryeqytetin francez synon të çojë më tej partneritetin strategjik mes dy vendeve, duke konsoliduar mbështetjen franceze për procesin e integrimit evropian të Shqipërisë dhe duke hapur rrugë për zgjerimin e bashkëpunimit ekonomik e politik.