Në një botë të përfshirë nga konfliktet, presidenti francez Emmanuel Macron dhe kryeministrja italiane Giorgia Meloni kërkojnë unitetin: Dy liderët duket se do të tentojnë përmirësimin e marrëdhënieve të tensionuara mes tyre gjatë vizitës së kreut të Elizesë në Romë. Pak udhëheqës të tjerë europianë janë kaq të distancuar mes tyre sa Macron dhe Meloni, shkruan Neë York Times: Rrënjët e saj politike janë tek e djathta nacionaliste; të tijat, tek qendra globaliste dhe teknokratike. Vazhdimisht janë përplasur me njëri-tjetrin, dhe njerëz në rrethin e Melonit e pranojnë se ajo nuk e ka me sy shumë të mirë kryetarin e shtetit francez. Megjithatë, ata pritet të zhvillojnë një takim dypalësh në Romë, gjatë udhëtimit të parë zyrtar të presidentit francez në Itali, posaçërisht për të takuar kryeministren italiane që kur ajo mori detyrën në vitin 2022. Pas kritikave publike që të dy shkëmbyen muajin e kaluar, vizita e Macronit nxjerr në pah presionin e madh ndaj liderëve europiane për t`u afruar rreth qëllimeve të tyre të përbashkëta, vazhdon shkrimi. Pavarësisht dallimeve të tyre, besohet se si Macron ashtu edhe Meloni dëshirojnë fundin e luftës së ashpër në Ukrainë, shmangien e një lufte tregtare me Shtetet e Bashkuara dhe një marrëdhënie të qëndrueshme me presidentin e paparashikueshëm amerikan Donald Trump.