Presidenti francez, Emmanuel Macron, ka paralajmëruar se kërcënimi nga sulmet hibride të Rusisë ndaj Evropës dhe Francës është intensifikuar. Në një konferencë për media në Pallatin Elysee, Macron ka thënë se ka urdhëruar hartimin e një plani për mbrojtjen e infrastrukturës kritike dhe objekteve të industrisë së mbrojtjes, përballë këtij kërcënimi. Ai ka bërë të ditur se Franca është shënjestruar nga sulme hibride ruse gjatë javëve të fundit, duke paralajmëruar se ato nuk do të mbeten “pa përgjigje”. Një numër në rritje i liderëve evropianë kanë paralajmëruar se Rusia mund të jetë duke përgatitur sulme për të testuar vendosmërinë e vendeve evropiane në mbështetjen e Ukrainës. Presidenti francez foli për gazetarët pas takimit me liderët e partive politike, me të cilët diskutoi ndikimin e luftërave në Lindjen e Mesme dhe në Ukrainë në sigurinë e Francës. Ai përmendi sulmin me dron të muajit të kaluar në aeroportin e Lajpcigut në Gjermani, për të cilin Rusia është fajësuar, si dhe deklaratat e kryeministrit polak, Donald Tusk, se Rusia po planifikon sulme me dronë dhe raketa ndaj Polonisë dhe vendeve të tjera në krahun lindor të NATO-s. “Në javët e fundit, kërcënimi hibrid rus ndaj evropianëve dhe ndaj Francës është intensifikuar. Qëllimi është të na frikësojnë dhe të thyejnë përpjekjet tona për të mbështetur Ukrainën. Rezultati do të jetë pikërisht i kundërt. Ne nuk frikësohemi, sepse e dimë se siguria jonë sot dhe nesër është në lojë në Ukrainë”, shtoi Macron.